10
Feb
11

Çumadas atorn

Al entra una dì un om dal paîs ta ostaria e denti al ere il stradin cal zuave di cjartas. «Jooo, cjalait achì ve! Ce raza di stradins! Lôr ta ostaria e jo a spostâ i claps ca son su pa strada». No lu vessia mai det. Al salta sù il stradin dut insurît e ai berla: «Cui cji aie dât il permès di spostâ i claps, cîr di imparâ a lassâ stâ la rouba di chei aitis che chei ai son miei». La cjace dal gjaul. Cidinada la facende, l’om nol à plui dousât a dî nua.

Par Pasca a gno fî, che al à fruts piçui, ai vevin regalât tancj di chei ûfs di cjicolata che no son rivâts a finîju e alore – metûts intune sporta – mai à puartâts e mi à det: «Cjomo dâju as gjalinas che ai son vecjos». «Ce gjalinas mo! Massapassût! chescj achì ju mangj jo e dopo dio cuant incà las gjalinas mangjno cjicolata e po impara ca no son migo lôr cas fâs i ûfs di Pasca!».

Cuant che al è vignût in Setembar il teremot erin a lavorâ das bandas di Povoleit e a durmî a Savorgnan intune voliere (chi vin durmît aì par un an!). Insoma gjavin il tet da cjasa e no eise vignude la scjassade, colât jù ce che al ere restât sù. Sin saltâts fûr a colp e vin cjatât la parone da cjase – che nus faseva encje da gustâ – e chê cun duta la calma di chest mont: «Bon, dopo miesdì podeis tornâ a tacâ che tanto il risot (che as erin colâts dentri polvar e di dut) lu ai spostât di pagjele!». Cuant che si dîs che i furlans a tegnin dûr…

Tornant di une noce chel che al guidave (al veve bevût doi tais di numar) al à cjatât une deviazion sul puest e al à tirât dret e i carabinîrs cai era aì lu fermin: «No jodial che ‘nd è una deviazion». E l’autist: »Ce deviazion e deviazion jo scuen jodi di lâ a cjasa ve!». E il manaçon al cjala un tic la machina e al luma i flocs e ai zonta: «E dopo cirît di lâ a cjasa chi sint fint achì il flât di vin». E chel ati: »Ce vin po, al sarà chel sentât devûr». Insoma tira, para e mola lu àn lassât lâ.

Una dì sei lât a cjatâ mê fie aventi jù e no aie metût l’alarme devûr da puarte di cjase e jo a spiegâi: «Tu sâs che su di cjase jo no met chei argagns aì, però devûr dal puarton ai simpri la forcje poiade e chei ca entrin no la jodin ma sa mi fasin zirâ las balas, salti sù come Lucifero ve!».

Agnorums indaûr un om, cjoc madûr, al è lât a trai la recue a di una vecja dal paîs. La vecja a era sul jet – coma ca si usava una volta – e tor tor ai erin prontâts a la folche cji trai i vêi (che si usavin no tant timp indaûr). Noma che l’om al banducelave e tricula una volta e tricula dôs al à pierdût l’ecuilibri e par stâ in pîts no si eisal picjât su pai vêi. Si è dispicjât po dut e il cjoc al è plombât sul jet cu la muarte e stant che al ere un di chei stramaçs a molas noi eise tombolade la femine a brazzecuel. No us dîs la fadia che al à fat par diliberâsi. Dut intorzolât tai vêi, cu la femine oltre da cope (che – cemût che al à deti lui) no si judave. Insoma al è rivât adore a disgredeâsi di dut e al è scjampât prime che lu jodessin, lassant dut chel casin. Chissà po ce che ai àn pensât chei vignûts dopo….

Annunci


febbraio: 2011
L M M G V S D
« Mag   Mar »
 123456
78910111213
14151617181920
21222324252627
28  

Blog Stats

  • 1.812 hits

Commenti recenti

Juan su Une volte…
tut su Une volte…
Annunci

%d blogger hanno fatto clic su Mi Piace per questo: